காளிகாம்பாளிடம் தான் சினிமாவில் சேர வேண்டுமென வேண்டினார். A.V.M. ல் நடந்த ரஜினி படப்பிடிப்பை வேடிக்கைப் பார்க்க போக, அங்கு அறிமுகமான ஒருவர் ஜிம்பாய்ஸ் – ல் ஒருவராக சேர்க்க சீரூடைக்கு அளவெடுக்க வைத்தார்.ஜெயம் S.K. கோபி சினிமாவில் சேர்ந்த முதல் நிறுவனம் காளிகாம்பாள் ஜிம் பாய்ஸ். அதுதான் அவர் வாழ்வில் நடந்த முதல் அதிசயம்.
சாதாரண ஜிம் பாயாக இருந்தவர் ஒரு சில திரையரங்குகளில் படம் வெளியிடும் உரிமையை வாங்கி வெளியிட்டு வந்தார்.
அந்த நேரத்தில் தேவர் பிக்சர்ஸ் ஐயப்பன் என்பவர் மூலமாக ஒரு Area வாங்கும் விநியோகஸ்தராக மாறினார்.
அக்காலத்தில் ஒரு உச்ச நடிகரின் படத்தின் தமிழ்நாட்டு உரிமையை வாங்கி விநியோகம் செய்தார். பெரும் நஷ்டத்தை சந்தித்தார் ஜெயம் S.K. கோபி. அந்த சூழ்நிலையிலும் தொடர்ந்து காளிகாம்பாளை தரிசித்து வந்த கோபியிடம் ஒரு நாள் அவர் தாயார் கலா இங்கேருந்து அவ்வளவு தூரத்துல இருக்கற கோவிலுக்கு போறே. பக்கத்துலேயே ஆண்டியை அரசனாக்கும் பழநியாண்டியை பார்த்து விட்டு வா என சொல்ல, அரை மனதோடு முதல் முறையாக வடபழநி ஆண்டவர் கோவிலுக்கு சென்றார் ஜெயம் S.K. கோபி.

பிறந்தநாள் முதலாக கோபியை பார்த்து கொண்டிருந்த முருகனை முதன் முறையாக கோபி பார்த்தார். பார்த்ததும் அவர் வசம் வந்தது பரவசம். குமரன் குறும்பாக சிரித்தான். மனதின் பாரம் பாதியானதோர் போல் ஒரு உணர்வு. முக்காலமும் அறிந்த முருகனை முப்பொழுதும் வணங்கத் துவங்கினார். மாதம் முப்பது நாளும் அசைவம் உண்டு என உண்டு வந்தவர் முதன் முறையாக முருகனுக்காக செவ்வாய்கிழமைகளில் அசைவம் சாப்பிடுவதை தவிர்த்தார். முருகன் மேல் பிடிப்பு அதிகமானது.
சாதிக்கத்துடிப்பவரை சோதிக்க நினைப்பது தானே அந்த சிவபாலனுக்கு மிக பிடித்த விஷயம். அவர் விநியோகம் செய்த படங்கள் சரியாக போகாததால் கடும் நெருக்கடியை சந்தித்தார் கோபி.
ஒரு நாள் இவர் வடபழனி கோவிலுக்குள் இருக்கும் போது ஒரு கைப்பேசி அழைப்பு தந்த கசப்பு, முருகன் அவரை கை விட்டதாய் நினைக்க தூண்டியது. அந்த ஆதங்கத்தில் கோபத்தில் இனி உன் முகத்தில் விழிக்க மாட்டேன் என்று கொடி மரத்தருகே கண்ணீர் சிந்தி வெளியேறினார். போன வரை போகட்டும் என்று போனவரை தடுத்து நிறுத்தவில்லை முருகன்.

கோபி புழுங்கினார், புலம்பினார், இனி இருளே வாழ்க்கையாகி விடுமோ? என நினைத்த போது ஒளியாய் ஒருவர் வந்தார். அவர் பெயர் ஜெயக்குமார். கோபியின் ஜாதக கட்டங்களில் சட்டங்கள் செய்யும் நவகிரகங்களை பார்த்த பின் உமையவள் பாலன், உமையவன் கைவிட மாட்டான். உன் வாழ்வில் நீ வணங்க வேண்டிய தெய்வமே முருகப்பெருமான் தான் உடனே அவனை தேடிச் செல் என்று ஜெயக்குமார் சொல்ல, பட்டது போதும் அவனாலே என ஜெயம் S.K. கோபி மனம் வெதும்ப, கெட்டது போதும் என்றால் போய்தான் ஆக வேண்டும் என்று ஜெயக்குமார் சொன்னார். அவரை குருவாக ஏற்றுக் கொண்டு அவர் சொன்ன சொல்லை மீற முடியாமல், மீள முடியாத பிரச்சினைகளுடன் மீண்டும் வடபழநி வேலவனை தரிசித்தார் ஜெயம் S.K. கோபி.

இம்முறை அந்த மூலவன் மூலம் அதிசயம் நிகழ்ந்தது. தன்னை நம்பினார் கெடுவதில்லை என உணர்த்தும் வகையில் மூன்றே நாளில் ஜெயம் S.K. கோபியின் பிரச்சினைகளை தீர்த்து வைத்தான் அந்த வேலவன்.

இந்த சமயத்தில் தொடந்து 48 நாட்கள் முருகனின் திருப்பள்ளி எழுச்சியை பார்க்கும் படி ஜெயக்குமார் அவர்கள் உத்தரவிட, ஜெயம் S.K. கோபி அதை நிறைவேற்ற தினமும் திருப்பள்ளி எழுச்சி காண சென்றார். வாழ்க்கை மாறியது. கை உயர்த்தி கருவறையில் நிற்பவன் கைத்தூக்கி விட்டான். நலிவு நீங்கி பொலிவு வந்தது.

அந்த கால கட்டத்தில் ஜெயம் S.K. கோபி கொல்லி மலையிலிருந்து சென்னை வடபழனிக்கு வந்திருந்த சுந்தரானந்தா சுவாமிகளை சந்தித்தார். அடுத்த நிலைக்கு அழைத்து செல்லும் குருவாய் அவர் இருந்து 48 நாள் மது அசைவம் சாப்பிடுவதை நிறுத்த சொன்னார்.

ஜெயம் S.K. கோபி சுந்தாரனந்த சுவாமிகளை தன் குருவாக ஏற்றுக் கொண்டு குருவின் வாக்கை ஏற்று அதை கடைப்பிடித்தார். இந்த சூழ்நிலையில் அவரின் ஆன்மீக ஈடுபாடே அரசியலில் நுழைய வைத்தது. தன் முகநூல் பக்கங்களில் கடவுளை மறுக்கும், கடவுளை நிந்திக்கும் நபர்களை இவர் வசை பாட அரசியல் அவரை அரிக்க ஆரம்பித்தது. தினமும் சண்டை, சச்சரவு, விவாத நிகழ்ச்சி. மெய் பேசும் இவரை பொய் சூழ்ச்சி ஒன்றை செய்து you tube காணொளி மூலம் களங்கப்படுத்தியது விதி. இன்று வரை காட்சிப் பொருளாய் அந்த காணொளி இருக்கிறது.

அப்போது தான் அவருக்குள் ஞானம் துளிர்விட துவங்கியது. எல்லாமே மாயை முருகன் மட்டுமே நிஜம் என உணரத்துவங்கினார். அந்த காலகட்டத்தில் அரசியல் குறித்து you tube சேனலில் பேச சென்ற இவரை தமிழ்க் கடவுள் முருகனைப் பற்றி பேசச் சொன்னது ஒரு பெண் தமிழ். என்ன பேசுவது என்று யோசித்தார். முருகனை யாசித்தார். அவன் வந்து நின்றான் பேச வைத்தான். அந்த பேச்சின் முடிவில் இப்பிறவி மூச்சின் கடமையை புரிந்து கொண்டார். முருகன் முழுதாய் ஜெயம் கோபியை ஆட் கொண்டான். அரசியலை விட்டு முழுமையாக வெளியேறினார். இனி என் வாழ்வில் அரசியல் இல்லை என அதிகாரப்பூர்வமாக அறிவித்தார்.

அறுபடை அரசனின் முகம் தினமும் வந்து போனது. தொடர்ந்து முருகனின் புகழை you tube Channel களில் பேசி வந்தவர் நாளடைவில் முருகன் அருளை பரப்பும் சேனலாக இவரே மாறினார்.
நொந்து போன நெஞ்சங்களுக்கு முருகன் மருந்து தருவான் என்று உரக்கச் சொன்னார். தன் உறக்கத்திலும் சொன்னார். தனக்கு தந்ததை முருகன் எல்லாருக்கும் தருவான் ஏனென்றால் அவன் தந்தைக்கே அறிவு தந்த தந்தை என பாமர மக்களுக்கு புரிய வைத்தார். மேலும் கலியுக தெய்வமான கந்தனின் அருளை பரப்ப திரைப்படம் எடுக்க முடிவு செய்தார்.

இந்த காலக்கட்டத்தில் தான் முருகப்பெருமான் உத்தரவுப்படி கண்பார்வை இல்லாத, காது கேளாத, மனம் மற்றும் மூளை வளர்ச்சி குன்றிய குழந்தைகளுக்கு நேரடியாக உதவத் தொடங்கினார். அவர்களை தெய்வக் குழந்தைகள் என அழைக்கும்படி முருகன் உத்தரவிட்டதாக உலகிற்கு சொன்னார்.
ஜெயம் கோபியின் அடுத்த நகர்வு இமய மலைப் பயணம்.. பிரபஞ்ச சக்தியின் பேராற்றலை பற்றிய உண்மையை இவருக்கு உணர வைத்தது அந்த பயணம். தியானம் அவரை ஆட்கொண்டது. மூன்றாவது கண் விழிப்பு நிலை தியானத்தை ஒருவர் தானாக முன்வந்து இவருக்கு சொல்லித் தந்தார். ஆன்மீகம் அவரை ஆளத்துவங்கியது.

வேலவனை பற்றி அவனை தொழுதால் தொற்றிய வினை தொலையும் என்ற உண்மையை உலகுக்கு உணர்த்த முருகர் அழைக்கிறார் என்ற நிகழ்ச்சியை நடத்த திட்டமிட்டார். இதற்கிடையே தெய்வ குழந்தைகளுக்கு உதவ பழநி சென்று யாசகம் கேட்கும்படி தியானத்தில் முருகன் உத்தரவிட யாசகம் வாங்கி குழந்தைகளுக்கு உதவினார்.

ஆரம்பத்தில் இரண்டு குழந்தைகளுக்கு மட்டும் செவித் திறன் அதிகரிக்கும் கருவி வாங்கித்தந்த ஜெயம் கோபி இன்று 69 க்கும் மேற்பட்ட குழந்தைகளுக்கு அந்த கருவியை வாங்கி தந்துள்ளார். அப்படி அந்த குழந்தைகளுக்கு நன்மை நடக்க இவரே ஒரு கருவி தான் என்பது அவருக்கு புரிந்து இருந்தது.
மன வளர்ச்சி குன்றிய தெய்வக்குழந்தைகளை பூம்பாறை முருகனை தரிசிக்க வைத்து அந்த மூலவனின் அபிஷேக தீர்த்தத்தை அவர்களுக்கு கொடுத்தால் அவர்கள் வாழ்வில் மாற்றம் ஏற்படும் என்று முருகனின் உத்தரவை உலகிற்கு எடுத்து சொன்னார்.

மற்றொரு நாள் தியானத்தில் முருக பக்தர்கள் சகல செல்வமும் பெற பெளர்ணமி தினத்தன்று இரவு தங்கி திருச்செந்தூர் செந்திலாண்டவரை வணங்க வேண்டும் என உத்தரவு வர அதை ஒரு you tube Channel – லின் நேர் காணலில் இவர் சொன்னார்.
தொடர்ந்த பெளர்ணமி நாட்களில் செந்தூரானை தரிசிக்க லட்சோப லட்சம் மக்கள் ஒன்று கூடி முருகர் யுகத்தை துவக்கி வைத்தனர். கடலலைக்கு நிகராக கந்தன் அலை வந்தது. இவர் கூறிய ஆறுமுகம் அருளிடும் அனுதினமும் ஏறுமுகம் என்ற மந்திரம் முருக பக்தர்களின் வாழ்க்கையில் அற்புதத்தை நிகழ்த்தியது.
தங்கள் வாழ்க்கையில் நடந்த அற்புதங்களை பொது வெளியில் எழுதவும் சொல்லவும் வைத்து பக்தர்களை முருகன் அருளுக்கு சாட்சியாக மாற்றினார்.

இவர் ஒரு பேட்டியில் கூறிய முருகர் மந்திரமான “ஆறுமுகம் அருளிடும் அனுதினமும் ஏறுமுகம் என்ற மந்திரம் பல முருகர் பக்தர்களின் வாழ்க்கையை ஏறுமுகமாக மாற்றியது.இன்றும் உலகம் முழுவதும் பல வாகனங்களில் இந்த மந்திர வாசகம் இடம்பெற்றுள்ளது கூட கந்தனின் கருணை தான்.

முருகப்பெருமான் உத்தரவோடு இவர் நடத்தும் “முருகர் அழைக்கிறார்” நிகழ்ச்சி உலகம் முழுவதும் உள்ள முருகர் பக்தர்களுக்கு பல உண்மைகளை உணர்த்தி முருகர் பாதத்தில் இனைய வைத்தது. மேலும் இந்த நிகழ்வில் பேசும் முருகர் சாட்சிகளை பார்த்து கந்தன் கருணையை எண்ணி முருகர் பக்தர்கள் மெய் சிலிர்த்து போனார்கள்.

இவரது இரண்டாவது இமயமலைப் பயணம் முருகப்பெருமான் கைலாயத்தில் இருந்து புறப்பட்டு முதலில் வந்து நின்ற இடமான இமயமலை கார்த்திக் சுவாமி திருக்கோயிலை காண வைத்தது. சிலிர்த்து போனவர் திருக்கோயில் பற்றி மக்களுக்கு சொல்ல அதனால் இன்று ஆயிரக்கணக்கானோர் இமயமலை முருகனை தரிசிக்க சென்ற வண்ணம் உள்ளனர். இனி கயிலையில் மயிலையும் காணலாம் என எடுத்துரைத்தார் ஜெயம் கோபி..
ஒருவன் வாழ்க்கை சிறக்க பூர்வ புண்ணியம் முக்கியம். அந்த பூர்வ புண்ணியம் வரும் பிறப்புகளில் வலுவாய் இருக்க, பாவத்தின் பாரத்தை குறைக்க புண்ணியம் அறக்கட்டளையை தோற்றுவித்தார் ஜெயம் கோபி.. தன் காலத்திற்கு பிறகும் தெய்வக்குழந்தைகளை ஆதரிக்க, அவர்கள் துயர் துடைக்க ஏதுவாய் புண்ணியம் அறக்கட்டளையை உருவாக்கினார். ஆறுபடை முருகனை வணங்குபவர்கள் மட்டுமே தன்னை பின்பற்றுப்படி வெளிப்படையாக சொன்னார்.
தொடர்ந்து அவரிடம் கஷ்டங்களை சொல்லி பரிகாரம் கேட்பவர்களுக்கு அவனிடத்தில் அதிகாரம் பெற்று ஆறுமுகம் கட்டளையை சொல்கிறார். கஷ்டம் கரைந்ததாக ஆனந்த கண்ணீர் விட்டனர் பலர். உத்தரவிடுபவன் பெயரை உதிரத்தில் எழுதி உழைக்க துவங்கி உள்ளார் ஜெயம் கோபி.

இவர் 2025 ஆம் ஆண்டு வரை காது கேளோதோர் வாய் பேச முடியாதோர் தெய்வ குழந்தைகளுக்கு செவித்திறன் மெஷினும் பார்வையற்ற தெய்வ குழந்தைகளுக்கு 500 பேருக்கும் தேவையான உதவிகளையும் மற்றும் வயதான பார்வையற்றோர் காது கேளோதோர் வாய் பேச முடியாதோர் ஆகியவர்களுக்கும் தன்னுடைய புண்ணியம் அறக்கட்டளை மூலம் அவர்கள் வருமானம் உயர புதிய தொழிலையும் ஊக்குவித்து அதற்க்கான உதவியையும் செய்து வருகிறார்.

இதுவரை இவர் தன்னுடைய முருகர் ஆராய்ச்சிக்காக தமிழ்நாட்டில் உள்ள பல்வேறு பகுதிகள் உட்பட இமயமலை தொடங்கி மும்பை பெங்களுர் வாராணசி உப்டப இந்தியாவிலுள்ள பல்வேறு மாநிலங்களுக்கு சென்றிருக்கிறார். மேலும் மலேசியா சிங்கப்பூர் துபாய் உள்ளி்ட்ட நாடுகளுக்கும் சென்று அங்குள்ள முருகர் சொந்தங்களை சந்தித்து உள்ளார்..

இவருடைய சமீபத்திய மலேசியா பயணத்தில் இவர் வெளி உலகிக்கிற்கு காட்டிய சுனைங்கி போர்ட் என்ற மலை சிவ சண்முக முருகர் கோவிலின் அற்புதங்களை அதிசயங்களை வெளிகொண்டு காட்டினார். அச்சமயம் இவருக்கு வானத்தில் மேகத்தில் மயில் மீது முருகர் காட்சி கொடுத்த அதிசயமும் நடந்தது. அதனை தொடர்ந்து அவருடைய சிங்கப்பூர் பயணம் வியட்நாம் தொடங்கி பழனி வரை முருகர் வழிபாட்டு இருந்தது என்ற உண்மையை இவருடைய முருகர் ஆராய்ச்சி மூலம் வெளி கொண்டு வந்தார்.

முருகன் மீது அவருக்குள்ள ஆழமான பக்தி எழுத்து உலகிலும் தன் தடத்தை விட்டுச் செல்கிறது அந்த பக்தி உணர்வை அவரை எழுத்திலிருந்து விலகவிடாமல் செய்தது தற்போது அவர் முக்கியமான திருப்புகழ் பாடல்களுக்கு அர்த்தம் பொருள் ஆன்மீக விளக்கங்களுடன் விரிவாக எழுதி வருகிறார் அவை குமுதம் பக்தி இதழில் தொடராக வெளியாகி பக்தர்களிடையே பெரும் வரவேற்பை பெறுகின்றன.

மேலும், அவர் அருணகிரிநாதர் சென்ற பல தலங்களுக்கு பயணம் செய்து, அதில் பெற்று அனுபவங்களையும் அறிய தகவல்களையும், “அருணகிரிநாதரை தேடிய பயணம்” என்ற தொடர் மூலமாக “ஆதன் ஆன்மீகம்” யூடியூப் சேனலில் பகிர்ந்து வருகிறார். இதன் மூலம் அருணகிரிநாதர் வாழ்க்கையும், திருப்புகழின் ஆன்மீக செய்திகளும் பலரிடம் எளிதில் சென்றடைகின்றன.

இதனை தொடரந்ந்து உலகம் முழுவதும் பயணித்து நாடெங்கும் உள்ள முருக பக்தர்களை ஒன்று திரட்டி அடுத்த தலைமுறைக்கு பக்தியை பரவச் செய்யும் பரவச நிலை அடைய பம்பரமாய் சுழன்று கொண்டிருக்கிறார் ஜெயம் கோபி.

அந்த முருகனை சுற்றி வரும் ஜெயம் கோபியின் கைப்பற்றி பின் நடக்க ஆயிரம் பேர் அணி வகுக்க துவங்கி விட்டனர். முதன் முதலில் உலகம் சுற்றி வந்த முருகப்பெருமான் புகழை ஆஸ்திரேலியா, அமெரிக்கா, மலேசியா, சிங்கப்பூர், லண்டன், என உலக நாடுகளில் பரப்ப உள்ளார்.
முருகன் புகழை பரப்புவதே வாழ்வின் லட்சியம் என வாழத்துவங்கியுள்ள ஜெயம் கோபியின் புனித நோக்கத்தில் நாமும் இணைவோம். முத்தமிழ் முருகனோடு கலப்போம்.